Навіны » Беларусь » 6 лютага 2009 а 7¹¹

«Малады Фронт» забараніў геям любіць Беларусь

5 лютага праект ГейБеларусь накіраваў ліст да арганізатараў акцыі «Любові! Свабоды! Пераменаў!», арганізаванай рухам «Малады Фронт», з просьбай дазволіць далучыцца да акцыі 14 лютага, прымеркаванай да Дня ўсіх закаханых. Праект ГейБеларусь падтрымаў лозунг і мэты акцыі.

Але нягледзячы на тое, што лідар «Маладога Фронту» Зміцер ДАШКЕВІЧ на афіцыйным сайце акцыі заклікае далучыцца да яе ўсіх ахвотных, руху ГейБеларусь было адмоўлена ва ўдзеле ў акцыі. Праект ГейБеларусь атрымаў ліст, у якім гаворыцца, што «Малады Фронт, як арганізацыя заснаваная на маральным падмурку хрысціянскіх каштоўнасцяў, асуджае садомства і ня можа дазволіць вам (ГейБеларусі) удзел у сваіх мерапрыемствах.» Таксама ў лісце адзначаецца, што «ўдзел прадстаўнікоў вашага праекту (ГейБеларусі) ў маладафронтаўскай акцыі на Дзень Святога Валянціна будзе расцэнены намі як правакацыя, на якую мы будзем вымушаныя адпаведным чынам і рэагаваць.»

Такім чынам актывісты «Маладога Фронта» плануюць або збіць прадстаўнікоў ЛГБТ–супольнасці, або здаць іх міліцыі. Да іншага, на дадзены момант акцыя яшчэ не санкцыянавана мінскімі ўладамі.

Лідар «Маладога Фронту» Зміцер ДАШКЕВІЧ: «Малады фронт» з′яўляецца ініцыятарам гэтай акцыі. Мы ніколі не гаварылі, што маем нейкую манаполію на нейкае мерапрыемства, намі ініцыяванае. З радасцю заклікаем усіх, хто жадае, далучацца да тых акцый, якія мы будзем ладзіць, прымеркаваных да дня святога Валянціна, да дня любові.»

Таксама ў апісанні акцыі адзначаецца: «Акцыя Любові — традыцыйны моладзевы хэпініг ў цэнтры Мінску, прысвечаны Дню Святога Валянціна — святу любові, пазітыву і добрых эмоцый. Моладзь пераканана, што ў гэты дзень варта не толькі дарыць радасць блізкім і сваякам, але і прызнавацца ў любові да роднай Беларусі. Традыцыйна Малады Фронт імкнецца прадэманстраваць неад′едмнасць нашай краіны ад еўрапейскай сям′і народаў, таму акцыя мае і выразную еўрапейскую накіраванасць.»

У аргкамітэт акцыі «Любові! Свабоды! Пераменаў!» сёлета, акрамя маладафронтаўцаў, увайшлі Аляксандар Мілінкевіч, Уладзімір Арлоў, Піт Паўлаў, Алесь Пушкін і Павел Севярынец.

Лідар праваабарончага праекту ГейБеларусь Сяргей АНДРОСЕНКА пракаментаваў сітуацыю наступным чынам: «Рабяты з Маладога Фронту відавочна заблыталіся: тут Зміцер Дашкевіч зразумелай мовай запрашае да сябе на акцыю ўсіх, тут нам ужо выстаўляюць забарону, тут яны хочуць прадэманстраваць сваю прыхільнасць дэмакратычным прынцыпам, а тут яны ўжо не хочуць. Маладафронтаўцы ўжо не аднойчы прадэманстравалі тое, што слова «свабода», якое яны так часта эксплуатуюць у сваіх мэтах, насамрэч для іх нічога не азначае, па–гэтаму трое з яе лідараў ужо і апынуліся ў беларускім спісе гамафобаў. Яны не гатовы адпавядаць еўрапейскім прынцыпам. Мы будзем шукаць магчымасці сустрэчы з лідарам беларускай апазіцыі Аляксандрам МІЛІНКЕВІЧАМ, які да гэтага часу пастаянна пазбягае кантактаў з намі, каб папрасіць у яго спрыяння ў пытанні барацьбы з гамафобіяй у колах беларускіх дэмакратаў».

Пытанне гамафобіі па–ранейшаму застаецца актуальным як у колах урадавага апарата, так і ў колах беларускай апазіцыі, частку якой фінансуе захад, з мэтай пабудовы ў Беларусі дэмакратычнай грамадзянскай супольнасці.

Афіцыйна праект ГейБеларусь вырашыў адмовіцца ад удзелу ў акцыі, але гэта не пазбаўляе магчымасці далучыцца да акцыі «Любові! Свабоды! Пераменаў!» асобных прадстаўнікоў ЛГБТ–руху са сваімі сцягамі або без іх.

Аўтар артыкулу: GayBelarus.by

 Надрукаваць  Адаслаць спасылку сябру  Атрымаць копію  Камэнтаваць