Навіны » Беларусь » 1 ліпеня 2009 а 1⁰²

Міжнародны Фонд па абароне праваабаронцаў Front Line далучыўся да кампаніі «Стоп артыкулу 193.1!»

Беларускія незарэгістраваныя праваабарончыя групы рызыкуюць апынуцца ў турме па артыкуле 193.1 Крымінальнага кодэкса. Артыкул 193.1 далучае да ліку супрацьзаконных любую праваабарончую ініцыятыву ў Беларусі і дае чыноўнікам магчымасць у любы час спыніць дзейнасць праваабарончых арганізацыяў.

У межах падтрымкі кампаніі «Стоп артыкулу 193.1!», якую праводзіць Асамблея НДА, самая вялікая беларуская кааліцыя НДА, Front Line заклікае адмяніць артыкул 193.1 КК Рэспублікі Беларусь. У 2005 годзе ў Крымінальны кодэкс Беларусі былі занесеныя палажэнні, якія далі законныя падставы для крымінальнага пераследу незарэгістраваных НДА. Паводле артыкула 193.1 КК, «незаконная арганізацыя або дзейнасць грамадскіх арганізацыяў, рэлігійных групаў ці фондаў, а таксама ўдзел у іх дзейнасці» пагражае пазбаўленнем волі на тэрмін ад шасці месяцаў да двух гадоў.

Заклікаючы далучыцца да кампаніі «Не артыкулу 193.1!», Асамблея прадэмакратычных НДА сцвярджае, што: за перыяд з 2005 па 2009 год 17 сяброў незарэгістраваных арганізацыяў былі асуджаныя да турэмнага зняволення ці штрафаў па артыкуле 193.1. У судзе ніводная справа па артыкуле 193.1 не была вырашаная на карысць абвінавачаных. Сотні прадстаўнікоў незарэгістраваных арганізацыяў былі дапытаныя ў розных дзяржаўных органах. Многія з гэтых людзей атрымалі ад пракурораў папярэджанні з патрабаваннямі спыніць іх дзейнасць у незарэгістраваных арганізацыях.

На цяперашні момант у Беларусі афіцыйна зарэгістраваная толькі адна незалежная праваабарончая арганізацыя — Беларускі Хельсінкскі камітэт. Многія беларускія праваабарончыя арганізацыі змагаліся за атрыманне легальнага статуту, аднак ім шмат разоў адмаўлялі ў атрыманні афіцыйнай рэгістрацыі па непераканаўчых прычынах.

28 траўня 2009 года Міністэрства юстыцыі Рэспублікі Беларусь у трэці раз адмовілася рэгістраваць праваабарончую арганізацыю «Наша Вясна».

«Наша Вясна» — новая назва Праваабарончага цэнтра «Вясна», які быў закрыты Вярхоўным судом па запыце Міністэрства юстыцыі ад 28 лістапада 2003 года падчас шырокамаштабных рэпрэсіяў у дачыненні да грамадзянскай супольнасці.

Нягледзячы ні на што, сябры «Вясны» працягвалі сваю законную дзейнасць у сферы правоў чалавека і садзейнічанні ахвярам розных парушэнняў гэтых правоў. Праваабарончы цэнтр «Вясна» — адна з найбольш актыўных беларускіх праваабарончых арганізацыяў, якія спецыялізуюцца асабліва на абароне, забеспячэнні выканання і пашырэнні палітычных і сацыяльных правоў.

9 красавіка 2009 году Міністэрства юстыцыі ў другі раз адмовілася рэгістраваць Беларускую Асамблею НДА. 3 чэрвеня 2009 году Вярхоўны суд пацвердзіў рашэнне Міністэрствы юстыцыі пра адмову Асамблеі ў рэгістрацыі.

15 красавіка 2008 году ў рэзалюцыі 1606 Парламенцкая Асамблея Рады Еўропы заклікала беларускія ўлады «адмяніць артыкул 193.1 Крымінальнага кодэкса, паколькі ён ўносіць у разрад незаконных дзейнасць незарэгістраваных арганізацыяў».

9 кастрычніка 2008 году Еўрапейскі парламент прыняў рэзалюцыю, якая заклікае беларускія ўлады ўнесці «неабходныя змены ў Крымінальны кодэкс Рэспублікі Беларусь, скасаваўшы артыкул 193.1». Аднак беларускія ўлады не забяспечылі выкананне гэтых рэкамендацыяў.

Front Line лічыць, што артыкул 193.1 неабходна адмяніць, паколькі ён абмяжоўвае дзейнасць законных праваабарончых арганізацыяў і супярэчыць палажэнням Усеагульнай Дэкларацыі Правоў Чалавека і Міжнароднаму пакту пра грамадзянскія і палітычныя правы, у якім Беларусь бярэ ўдзел.

Паводле Праваабарончы цэнтр «Вясна»

Аўтар артыкулу: Сяргей

 Надрукаваць  Адаслаць спасылку сябру  Атрымаць копію  Камэнтаваць