Навіны » Беларусь » 21 сьнежня 2009 а 18⁴⁹

Суды перанесены: 23 снежня адкрытыя паседжанні над актывістамі «ГейБеларусі»

23 снежня ў 16:15 у Судзе Савецкага раёна Мінска адбудзіцца судовае паседжанне над Сяргеем Прадзедам, а ў 17:15 у тым самым судзе адбудзіцца паседжанне над Сяргеем Андросенкам. Нагадаем, актывістаў праваабарончага ЛГБТ-руху затрымалі на акцыі ў абарону асуджаных на смерць геяў Ірана 16 снежня ля іранскага пасольства ў Мінску. Акцыя цягнулася 15 хвілін, пасля удзельнікі акцыі, а таксама карэспандэнтка незалежнай газеты «Наша Ніва» Настасся Шамрэй былі затрыманыя міліцыяй.

Сяргея Прадзеда абвінавачваюць па ч.1 артыкула 23.34 КоАП, а Сяргея Андросенку па ч.2 артыкула 23.34 КоАП - парушэнне ўсталяванага парадку арганізацыі ці правядзення схода, мітынгу, вулічнага шэсця, дэманстрацыі, іншага масавага мерапрыемства ці пікетавання». У прыватнасці, у пратаколе аб адміністратыўным правапарушэнні на Сяргея Андросенку паведамляецца: «грамадзянін Андросенка Сяргей Андрэевіч 16.12.2009г. арганізаваў правядзенне пікетавання не маючы на тое спецыяльнага дазволу, а менавіта трымаў у руках плакат «Спыніце забойствы геяў у Іране», тым самым парушыўшы ўсталяваны парадак правядзення і арганізацыі масавых мерапрыемстваў, усталяваных законам «Аб масавых мерапрыемствах у Рэспубліцы Беларусь» ад 30.12.1997 года».

17 снежня ўжо адбыўся суд над адным з удзельнікаў акцыі. Аляксандр Гагарын быў прызнаны вінаватым ва ўдзеле ў несанкцыянаваным пікеце і атрымаў штраф у тры базавыя велічыні (105 тысяч беларускіх рублёў).

Сяргея Прадзеда ў судзе будзе абараняць адвакат, а Сяргей Андросенка будзе прадстаўляць свае інтарэсы самастойна. Ён прызнае факт арганізацыі акцыі, але не прызнае свой учынак за адміністрацыйнае правапарушэнне, ён лічыць, што закон «Аб масавых мерапрыемствах у Рэспубліцы Беларусь» чыніць абміжаванні ў арганізацыі пікетаў і мірных сходаў, што супярэчаць Канстытуцыі Рэспублікі Беларусь і міжнародным абавязальніцтвам, што ўзяла на сябе Беларусь і з’яўляюцца недапушчальнымі для дэмакратычнай дзяржавы. Ён спаслаўся на ч.1 арт.21, ч.3 арт.21 і арт. 35 Канстытуцыі Рэспублікі Беларусь; арт.21 Міжнароднага пакта аб грамадзянскіх і палітычных правах, а таксама на ч.1.арт.20 Усеагульнай Дэкларацыі правоў чалавека.

Суд Савецкага раёна Мінска месціцца па адрасе Лагойскі тракт, 3.

Прыходзь падтрымаць Сяргея Прадзеда 23 снежня ў 16:15 і Сяргея Андросенку 23 снежня ў 17:15!

Аўтар артыкулу: ГейБеларусь, фота Настассі Шамрэй

 Надрукаваць  Адаслаць спасылку сябру  Атрымаць копію  Камэнтаваць