Навіны » Беларусь » 10 сакавіка 2009 а 6²²

Сумеснае Паседжанне праектаў ГейБеларусь і ГейРасія прайшло ў Мінску

7 сакавіка ў беларускай сталіцы ў сумесным Паседжанні праваабарончых праектаў прынялі ўдзел беларускія і расійскія геі, лесбіянкі і транссэксуалы. Таксама ўдзел у сходзе прыняла беларуская травесці–дзіва Ліка Мілоская, удзельніца і арганізатар шматлікіх забаўляльных і грамадскіх ЛГБТ–акцый у Беларусі, чалец ГейБеларусі, а таксама арганізатар Маскоўскага гей-прайда Мікалай Аляксееў. На Паседжанні было падрабязна расказана аб праробленай сумесна працы з моманту апошняй сустрэчы расійскіх і беларускіх актывістаў у студзені, абмеркаваныя і падведзеныя вынікі еўрапейскага турнэ ў падтрымку беларуска–расійскага Славянскага гей–прайда. Таксама станоўча былі адзначаныя факты абмеркавання Славянскага Прайда ў самой ЛГБТ–супольнасці, а таксама яго праціўнікамі. Апроч таго, праграма Паседжання ўключала ў сябе 10 пунктаў адносна дзейнасці праектаў.

Калегам з Расіі была прадстаўленая праграма Месяца барацьбы з гамафобіяй у Беларусі–2009, які пройдзе ў Беларусі з 17 красавіка па 17 траўня, расказана аб бачанні гэтай рэспубліканскай кампаніі, а таксама аб укладанні ў яе рэалізацыю праекту ГейБеларусь, суарганізатара гэтай месячнай кампаніі.

Некаторыя абмеркаванні выклікалі вялікія дыскусіі. Бурныя дэбаты разгарнуліся вакол такіх тэм, як удзел у Чарнобыльскім Шляхе беларускіх ЛГБТ–актывістаў, пытанне донарства крыві гомасексуальнымі людзьмі, а таксама пытанне стаўлення да творчасці і асобы Барыса Маісеева, які 28 сакавіка выступіць у Мінску. Адрозненне меркаванняў у сяброў праектаў навочна дэманструе дэмакратычны прынцып працы і правядзення Паседжанняў.

Таксама былі абмеркаваныя шляхі і магчымасць супрацоўніцтва з грамадскімі арганізацыямі і палітычнымі партыямі, а таксама з іншымі ЛГБТ–праектамі. З такіх праектаў асабліва дадатна было адзначана супрацоўніцтва з Галоўным Gay–радыё Расіі і Беларускім парталам геяў, лесбіянак, бісексуалаў і транссэксуалаў Gay.by.

Пасля афіцыйна–дзелавой часткі ўдзельнікі і госці Паседжання прынялі ўдзел у забаўляльнай: невялікі фуршэт у офісе Паседжання за сяброўскімі, цёплымі і адкрытымі гутаркамі, нефармальныя зносіны і абмеркаванне абсалютна розных тэм.

Затым удзельнікі і госці Паседжання былі запрошаныя на дзве гей–вечарыны, якія праходзілі ў гэты час у Мінску — у клубе «Врата дракона» і клубе «Люцік».

Праекты ГейБеларусь і ГейРасія — праваабарончыя праекты, якія адстойваюць права на каханне і натуральнае жыццё для гомасексуальных людзей Расіі і Беларусі, актыўнымі і радыкальнымі метадамі.

Аўтар артыкулу: Сяргей

 Надрукаваць  Адаслаць спасылку сябру  Атрымаць копію  Камэнтаваць