У Мінску прайшоў «Дзень маўклівасці» (+фота)

Навіны. Беларусь.
26 красавіка 2009 а 7⁰⁷.
Сяргей.

 Надрукаваць  Адаслаць спасылку сябру  Атрымаць копію  Камэнтары

25 красавіка ў Мінску ЛГБТ–актывісты правялі Дзень маўчання. Акцыя прайшла ў форме «маўклівага» флэшмоба. Яе ўдзельнікі з залепленымі скотчам ртамі прайшлі ад Белдзяржфілармоніі (станцыя метро «Плошча Якуба Коласа») да Нямігі, раздаючы мінакам улёткі з інфармацыяй аб тым, што такое гамафобія і чаму грамадству неабходна змагацца з гэтай праблемай.

Флэшмоб правялі актывісты Беларускай ініцыятывы за сэксуальнае і гендэрнае раўнапраўе і праваабарончага праекту «ГейБеларусь» пры падтрымцы грамадскага аб′яднання «Маладыя сацыял–дэмакраты — Маладая Грамада».

Не абыйшлася сённяшняя акцыя і без інцыдэнту. На праспекце Пераможцаў да ўдзельнікаў флэш–моба падышлі два міліцыянера з просьбай паказаць ім улёткі. «ГамафабІя — прачытаў адзін з міліцыянераў, зрабіўшы націск на апошнім складзе. — Што гэта? — пацікавіўся ён. — Нічога палітычнага, — адказаў адзін з удзельнікаў. — Сацыяльная акцыя». Пасля гэтага прадстаўнікі міліцыі некалькі хвілін вывучалі ўлёткі, а потым падвялі вынік: «Улёткі можаце раздаваць далей, але толькі адляпіце скотч з ротаў, а то падазрона выглядае. Нам сігнал паступіў, што ходзяць нейкія дзіўныя асобы з залепленымі ртамі і нешта незразумелае раздаюць».

Арганізатары акцыю лічаць удалай.